Хүүхэд, гэр бүлд чиглэсэн “ХӨГЖЛИЙН ХАРАНДАА ЭКСПО” энэ амралтын өдрүүдэд болно

2018-10-25

Нийслэлийн 379 жилийн ойн өдрийг тэмдэглэн өнгөрүүлэх ажлын хүрээнд хүүхдийн хөгжлийн чиглэлээр үйл ажиллагаа явуулж байгаа байгууллагуудыг олон нийтэд сурталчлах, хүүхдийн хөгжлийн үйлчилгээний нэр төрөл, чанар хүртээмжийг сайжруулах, сонголтыг өргөжүүлэх зорилгоор Нийслэлийн хүүхэд, гэр бүлийн хөгжлийн газраас санаачлан дөрөв дэх жилдээ “Хөгжлийн харандаа экспо”-г зохион байгуулж байна.

Экспо энэ сарын 27, 28-ны амралтын өдрүүдэд Зайсан хилл цогцолборт өглөөний 10:00-18:00 цагийн хооронд зохион байгуулагдана. Хөгжлийн харандаа экспогийн зохион байгуулалт, үйл ажиллагааны талаар нийслэлийн Хүүхэд гэр бүл хөгжлийн газраас өнөөдөр мэдээлэл хийлээ.

Нийслэлийн хүүхэд гэр бүл хөгжлийн газрын дарга Ө.Ган-Өлзий “Экспо зохион байгуулагдах өдрүүдэд тус цогцолборын бүх үйл ажиллагаа гэр бүл, хүүхэдрүү чиглэсэн байх болно. Хүүхдийн хөгжлийн чиглэлээр үйл ажиллагаа явуулдаг төрийн болон төрийн бус байгууллагууд оролцоно. Эцэг, эхчүүд хүүхдийнхээ онцлогт таарсан, сонирхсон дугуйлан, сургалт, хөгжлийн чиглэлийн үйлчилгээнээс сонгох боломжтой. Мөн гэр бүлд чиглэсэн сэтгэлзүйн зөвлөгөө, хууль зүйн мэдлэг олгох сургалт, гэр бүлийн боловсрол олгох сургалтууд зохион байгуулагдана. Түүнчлэн хүүхдүүд болон гэр бүлүүд дунд хөгжилтэй тэмцээн уралдаануудыг зохион байгуулна” хэмээн ярилаа.

Нийслэлийн хүүхэд гэр бүл хөгжлийн газрын хэлтсийн дарга Ц.Гэрэлтуяа “Хөгжлийн харандаа экспод олон улсын байгууллагууд, төрийн болон төрийн бус байгууллагууд, хүүхдийн оролцооны сүлжээ, хүүхдийн чиглэлээр үйл ажиллагаа явуулдаг урлаг, спорт, хувь хүний хөгжлийн клубууд, чөлөөт цагийг өнгөрөөх тоглоомын төвүүд, номын сангууд, хүүхдийн зуслангууд гэх мэт хүүхдийн хөгжлийн чиглэлээр үйл ажиллагаа явуулдаг бүх байгууллагууд оролцож байгаагаараа онцлогтой” гэв.

Энэхүү үйл ажиллагаагаар хүүхдийн хөгжил, оролцооны байгууллагуудын мэдээллийг нэг дороос авах боломжтой бөгөөд байгууллагууд хөнгөлөлттэй үнээр хүүхдүүдийг бүртгэх, өөрийн байгууллагадаа гишүүнээр элсүүлэх, сэтгэлзүйн оношилгоо, зөвлөгөө, сургалт лекц, тэмцээн уралдаан зохион байгуулагдана. 

Эх сурвалж: Unuudur.mn